香港政府統計處曾發表全港住戶調查報告，在逾25萬有養寵物的住戶中，有逾1萬名住戶曾因寵物自身原因考慮棄養，例如吠叫、長大後環境不足、患病等。主力暫托（又稱寄養）老狗的Bobo說：「其實任何動物都需要被尊重，當你選擇唔要佢嘅時候，佢又有無得選擇自己之後點？」而老狗亦需要被人關心及尊重，包括今次訪問的主角──阿瑪絲他。
阿瑪絲他的故事 來自大圍的懂性浪浪
阿瑪絲他（下稱阿瑪）在今年8月下旬來到Bobo家中，當時的阿瑪可算是飽經風霜。「當時嘅佢，周身傷口，無咩精神咁，好憔悴，於是我哋先幫佢由外傷開始醫，例如耳仔發炎呀咁，過咗個幾月先慢慢醫內部問題。」
據街坊指，在大約6年前發現牠在沙田大圍出沒，一直靠街坊餵養，直至牠年老身體明顯出現問題，令街坊主動尋求動物義工協助，輾轉之下，最後聯絡上做暫托的Bobo，「阿瑪係有晶片嘅，佢今年12歲，扣返流浪呢6年，可以推算其實係曾經有過屋企，然後被棄養。」
可惜流浪的日子久了，令阿瑪忘了有家的溫暖。「初初佢成日都想逃走，又會向住屋苑大門吠，喺屋入面又會因為不安而吠。所以當時我會陪佢一齊瞓地下，陪佢一齊慢慢適應，就算佢吠都唔會鬧佢，慢慢咁令佢信任我哋。」Bobo一家每日會帶阿瑪散步3次，家住屯門，每天散步路程達幾個輕鐵站，陪牠周圍去探索。
漸漸地，阿瑪慢慢習慣有人陪伴的新日子。「依家佢散步完就會『扯』你行，要帶你返屋企。」
「其實佢真係好純好懂性，我個仔對佢『搓圓撳扁』，佢都無問題，日日畀佢挨住瞓；又例如我每日都要擘大口餵佢食藥，佢都從未試過反抗。」
坎坷身世再遇打擊 阿瑪染上心絲蟲及確診腎病
「其實只係接咗佢返嚟唔夠兩個月，但已經經歷咗好多嘢。」除了皮外傷，阿瑪在獸醫檢查後確診了慢性腎衰竭，體內也受到寄生蟲的感染，令Bobo倍添擔心，「一嚟係責任感問題，見到佢病，我自己會好『肉赤』，而每個月醫藥費、各種各樣嘅保健品及補充劑，其實醫療開支都好大。」甚至令Bobo坦言「過得一日得一日。」
「其實同人一樣，狗狗年紀大咗，身體機能都會慢慢變差。因為一直流浪缺乏護理，佢係有腎病及有心絲蟲嘅，由8月尾開始食預防心絲蟲藥，到10月尾再返去打預防針，至於腎病方面，依家就要轉食腎糧同埋定期覆診。佢身體機能幾時會再轉差，其實無人預計到，但我會盡我能力做可以做嘅事。」
「其實狗狗都需要被人尊重，需要人關心。」
3年間暫托過6至7隻老狗，被問及聽過的話棄養原因，Bobo說：「其實真係『千奇百趣』，對於愛動物嘅人嚟講係不可理喻，例如上公屋、搬屋、隻狗會吠等等。甚至，狗狗性格也可以是棄養原因，「嫌佢太靜唔熱情啦，或者嫌佢太活潑，咩都有。」
曾經亦有寵物收容中心負責人向我們表示，他們接手的寵物當中，有部分狗狗來自獸醫診所，皆是因為寵物主人在帶寵物就醫，在知悉醫療費用後，表示放棄治療及決定棄養。
「其實狗狗無得揀，當你棄養，因為你要上公屋，你要搬屋，當你選擇唔要佢嘅時候，佢又有無得選擇自己之後點？其實狗狗都需要被人尊重，需要人關心。」Bobo帶點憤慨。棄養與否，其實也反映一個人能否「將心比己」。
在剛過去的9月底，Bobo暫托的另一隻15歲老狗黑妹因病離逝，同時令阿瑪情緒低落，精神和胃口都轉差，一度需要因脫水問題而住院。在4天的療程裡，Bobo每天都會從屯門坐車到北角的獸醫診所，天天聽醫生解釋驗血報告，仔細打點阿瑪的一切，「健健康康就講唔上，但只要保持到指數唔太差，已經算好好。」
「當開始做暫托之後，我發覺，原來你只要發多少少時間，你行多一步，其實已經幫到佢好多。」
Bobo 在2021年開設Facebook 專頁「兩母子」，名字源於之前暫托的兩隻年老狗狗，現在則主要發布阿瑪的日常生活和替其他浪浪尋暫托家庭為主，也是關心阿瑪的街坊們聚集之地，「我既然要幫呢隻狗狗，多一個人睇到，佢被領養嘅機會就會多一分。」
「就算到最後，對狗狗無任何直接幫助，我都希望可以做到『教育效果』，養寵物係一生一世嘅承諾。」
