若想照顧流浪動物，有些人會選擇當義工，有些人慢慢建立收容中心，有些人則選擇成為暫托（又稱寄養）家庭，讓一些命懸一線的浪浪得到「轉機」。十年前開始做暫托的Bobo，自言不算偉大，不論義工也好，經營狗場也好，即使身體力行的程度不同，初心也相同，相信「勿以善小而不為」。
由照顧BB貓狗 到主力暫托「老弱殘兵」
既有正職工作，家中亦有小朋友需要照顧，Bobo對暫托這份「工」很有原則：「我每次都只會畀自己『托』一至兩隻老狗，每次兩個月左右，你知道老狗有唔同嘅身體情況，我能力好細，但行一步就係一步。希望哪怕最後佢係無人領養，我自己都可以照顧多佢一陣。」
回想起十年前初接觸暫托這回事，Bobo和很多人一樣，都是負責照顧貓狗BB為主，原因是年幼貓狗被領養的機會相當高，「平均幾個月就會有人領養㗎喇！」如今捨易取難，又是甚麼原因令Bobo風向一轉，把心力留給年老狗狗？
「我停過一段時間無再做暫托，由三年前開始重新開始做，可能覺得人大咗，能力都大咗，就想幫到更多嘅狗。我當時問自己個心，BB狗易出（領養），咁老狗呢？其實佢哋都需要一個機會，我希望可以成為佢哋嘅過渡期，希望令佢餘下生命多一個機會。」
現時Bobo的屋苑不但對寵物友善，附近有狗公園，周邊也有專人清潔的狗廁所，身邊環境亦猶如對Bobo打了一枝強心針，即使每天要帶著老狗慢慢散步，也不致於太吃力。
「你選擇堅持就會搵到方法」
在主攻「老弱殘兵」的這三年間，Bobo照顧過六至七隻老狗，由兩母子（Bobo為一對年老狗狗開設的Facebook專頁）到現在的阿瑪絲他，因為多了照顧不同病況的經驗，令Bobo明白養一隻寵物的責任有多大，但問題再多，也不是棄養的理由。
「我喺其他訪問講過一句說話，至今仍然覺得好啱，就係當你選擇堅持，你會搵到方法，但若你想放棄，自然就會有好多藉口。況且，當你選擇棄養嘅時候，你有無尊重過佢（寵物）？」
就像當初照顧兩母子那段日子，原來Bobo是有嚴重的狗毛敏感。「我對狗毛敏感嘅程度，係全身都起紅疹，而我仲有其他敏感源，但我選擇咗幫佢，所以我選擇食抗敏感藥去控制，等身體慢慢接受。」也正如現正尋領養的阿瑪絲打，即使帶回來時發現有慢性腎病及心絲蟲問題，Bobo仍然願意帶牠定期覆診，每天餵藥，「佢身體機能幾時會再轉差，其實無人預計到，但我會盡我能力做可以做嘅事。」
「呢種堅持最後有咩結果？兩母子就係例子，當時兩母子過咗約定時間仍無人領養，需要送往狗場，但我𠴱陣同義工講，唔緊要啦，畀我頂多一陣啦，結果最後佢哋搵到個好好嘅主人。」
受個人能力所限，Bobo也有無法暫托的個案，所以她選擇在「兩母子」Facebook上幫忙尋找其他暫托家。
養狗和當暫托家庭的分別？
「我覺得我能力未大到可以養一隻狗，照顧佢嘅終生需要。」正因為見多了生老病死，令她非常認真地對待生命、尊重生命。「養一隻狗要花好多心力，亦要有一定經濟能力，我自己已經有小朋友要養，萬一狗狗真係遇上大病，你嘅積蓄只夠俾一半醫藥費，唔通叫醫生只醫一半？」Bobo笑言，在接受訪問之前，其實也了解過寵物保險，希望去緩解當時的狗狗醫療負擔。
「我屋企就係狗狗嘅娘家」
那麼喜歡狗狗，當暫托生活結束而需要和狗狗分離時，真的捨得嗎？
「當你決定做暫托，你無得揀唔捨得，如果你真係唔捨得，你可以揀領養隻狗，做佢嘅主人；但我決定做暫托初衷係想幫更多嘅狗，當你有太多唔捨得，其實你樣樣都會做得唔好。感情一定有嘅，時間培養出嘅關係都一定有，你要慢慢用時間去消化、去抽離，呢個係做暫托嘅難處。」
幸而，也有不少領養人和Bobo因為狗狗而成為朋友，例如兩母子的主人在公幹時，會把兩母子帶回Bobo家暫住，人和狗都會定期聚會。「我好感謝領養人願意信任我，令我好似多個朋友咁，而狗狗就會好似你仔女大個咗成家立室，返嚟探你一樣。」
「我會形容，我屋企就係狗狗嘅娘家。」
