接收大量因病被遺棄貓狗 沙律媽告急：差診所過百萬！
今年有研究報告指，2023年香港有30.4萬隻狗狗和28萬隻貓咪，數字有上升趨勢。雖然越來越多人視毛孩為一生的家人，但今年棄養個案亦屢見不鮮。於元朗開設浪浪收容所「沙律貓狗之家MCCC」的陳慧珍（沙律媽），更是接收過百隻因病而被遺棄的貓狗，令醫療開支超出負荷而欠獸醫診所逾百萬，需要發起告急，冀大家伸出援手。
快速閱讀：
全年247無休 照顧逾300隻流浪動物
「我自己係無人工嘅，有人（義工）買飯俾我食就夠。」沙律媽於1997年設立「沙律貓狗之家」，由粉嶺到元朗，經歷過業主逼遷，現時於元朗逢吉鄉租了一個約7萬呎的場地，收留逾300隻貓狗。因為有動物需要被24小時照顧，沙律媽索性居住在收容所，天天清潔、餵飯、餵藥和處理突發事，不收分毫，全年無休。
數百隻貓狗的日常生活，每天全靠沙律媽以及幾位義工輪班照料，義工們負責上百隻狗狗，沙律媽則「單拖」照顧逾80隻貓咪，以及一些行動不便、年紀大及患有重症的狗狗。沙律媽說笑謂：「每個人都係『一打幾十』，因為呢到好多動物都有病，我哋要維持一個乾淨清潔嘅環境，其實唔容易㗎，所以我哋成日都話，要綁住兩枝掃帚喺腰周圍走，見到一有屎就衝埋去。」
「呢到有近一半嘅狗狗都係7至8歲，過咗壯年，比較難搵人領養，貓貓𠴱邊雖然多1至3歲，有好多係名種貓，但佢哋大部分嚟自繁殖場，全部都『甩皮甩骨』，貓瘟、貓愛滋、貓腹膜炎……」
「所以，成功出領養嘅數量，遠遠追唔上接收棄養嘅數量，其實亦係好多機構都面對緊嘅情況。」
見證大量浪浪因病被遺棄 高峰期一次接收逾60貓狗
提到有感今年棄養的新聞數量有所上升，沙律媽亦表示認同。「今年明顯感受到，多咗人喺淘寶買貓狗，貪平，結果？有義工試過喺粉嶺火車站，目睹有人交收完即場遺棄隻狗仔，原因係『唔係佢心目中嘅樣』。義工問點解可以就咁掉低，棄養人仲話『我唔要喇，你要拎就拎去囉』。」
有人視生命如「玩具」，亦有人視生命如「生財工具」。「今年亦接咗好多名種貓，啲繁殖場『執笠』，次次都成十幾廿隻嚟搵我哋接收，最多試過一次60隻，大部分都有病，隻隻都要醫。」至此，沙律媽語帶憤慨：「當日你利用佢哋（賺錢）就得，咁點解你唔救咗佢先？醫好佢先交俾我哋？」
欠診所過百萬醫療費用 沙律媽堅持：救得，就係要照顧終老
為甚麼不選擇醫治而是棄養？當然是因為醫療費用不菲。收容所內逾300隻動物之中，有近3成有醫療需要，屈指一算，等同有近100隻貓狗需要看醫生，當中尤以貓咪佔比最多。
收容所內其中一宗緊急醫療個案：懷疑肝癌沙律家老貓「阿豬」
「醫療費用負擔……其實真係好沉重，例如一個急性肺炎，要做好多化驗搵成因，住一星期院，總共用咗2萬至3萬。我哋大部分醫療開支來自長期病患，有癌症、腹膜炎、腎問題、貧血等等……加上呢兩個月，又遇上過胃反轉，中風等等急症，係真係令我哋完全負擔唔到……」
今年6月，有報導提及沙律貓狗之家每月開支約20多萬元，本來已入不敷支，加上近兩個月的緊急情況，俗語有言「有頭髮邊個想做癩痢」，再節衣縮食，也令沙律媽現時不得再向外界告急。「我哋目前欠診所過百萬，最多一間欠150萬，亦有欠其他診所十幾至廿幾萬，日常開支、醫療費用、還款加上突發支出，現時每個月開支其實已經加到50萬元。」
「我哋當然會唔開心，可以自己做嘅我哋都自己做，例如打皮下水等等，因為想救，所以就會學，但有啲病就係必需要靠醫療工具。有診所想我哋還款之後先再繼續求診，我哋當然明白，我哋亦好無奈，例如狗狗手腳有事，無錢做手術，佢痛得犀利，我哋只可以俾止痛藥；貓貓腎病睇完一次醫生，我哋都無能力再帶佢去覆診。租同水電我都已經兩個月無交，你叫我點負擔？係好無奈嘅事。」
沙律媽於月前曾在網上發布「求救」短片
沙律媽現已暫停接收棄養個案，每天盡力照顧收容所內數百隻毛孩。雖然正處於水深火熱，有對現實的無奈，也有對現實的憤慨，但整在個訪問之中，她從來未有過半點氣餒之意，她說：
「我哋好辛苦去救佢返嚟，佢哋亦都好辛苦先生存到，我哋堅持，係因為佢哋（貓貓狗狗）嘅堅持，我更加唔可以放棄，應承咗，就要照顧佢一世㗎喇！」
沙律貓狗之家MCCC（慈善牌編號 : 91/15840）歡迎任何形式的捐贈，例如貓狗糧食、日用品（如尿墊和尿片等）、護理用品（如杜蟲劑和生理鹽水等），亦歡迎你加入助養毛孩計劃，當然，有意領養或成為義工者，隨時歡迎透過Facebook專頁與義工聯絡，以行動支持，「領養，不棄養」！
沙律貓狗之家捐款 PayMe QR Code
